The Israeli delegation in Tbilisi took part in the Hanukkah candlelight ceremony in the Israeli House. The event also hosted the presentation of the book “Invasion of the Soviet Union”
„ისრაელის სახლის“ მოწვევით, თბილისში მყოფი ისრაელის დელეგაციამ, ქნესეთის წევრის, ისრაელის კოალიციური მთავრობის ეკონომიკური ბლოკის პარტიის - „ქულანუს“ წარმომადგენლის აქრამ ჰასონის ხელმძვანელობით, „ისრაელის სახლში“ ხანუქას სანთლის ანთების ცერემონიაში მიიღო მონაწილეობა.
ღონისძიებაზე გაიმართა, აგრეთვე, წიგნის „შეჭრა საბჭოთა კავშირში“ პრეზენტაცია. მასში დოკუმენტურ მასალებზე დაყრდნობით მოთხრობილია გასული საუკუნის 80-იანი წლების ბოლოდან საბჭოთა კავშირიდან ებრაელთა მასობრივი რეპატრიაციის (დიდი ალია) პროცესზე და ამ მასშტაბურ მოვლენაში საქართველოს განსაკუთრებულ როლზე.
წიგნი გვაწვდის ინფორმაციას, თუ როგორ გაიხსნა „რკინის ფარდის“ მიღმა, საბჭოთა კავშირის მასშტაბით, საქართველოში სოხნუთის პირველი წარმომადგენლობა, რა ადგილი უკავია მას ბოლო 30 წლის განმავლობაში ჰასბარას (ისრაელის მხარდაჭერის) განვითარებაში.
წიგნი მალე მაღაზიათა ქსელშიც გაიყიდება. გაისად ის გამოვა ინგლისურ და ებრაულ ენებზე.
წიგნის ავტორია გიორგი ბერნშტეინი, რედაქტორი - პროფ. ცირა ჩიკვაიძე, მთავარი კონსულტანტი- იციკ მოშე.
პრეზენტაციაზე ქნესეთის წევრმა აქრამ ჰასონმა განაცხადა, რომ ისრაელის დელეგაცია სპეციალურად ამ წიგნის პრეზენტაციისთვის ეწვია. ეს გამოცემა ებრაელი ხალხის ისტორიის უმნიშვნელოვანესი მოვლენის - დიდი ალიის შესახებ მოგვითხრობს. საბჭოთა კავშირში ებრაული სააგენტოს - სოხნუთის პირველ წარმომადგენელზე, იციკ მოშეზე დაყრდნობით მასში მოთხრობილია დიდი ალიის დღემდე გაუხმაურებელი ფაქტები. წიგნის ებრაულ- და ინგისურენოვან გამოცემას მკითხველი ასევე მოუთმენლად ელის.
„ისრაელის სახლის“ ხელმძღვანელმა კი ისაუბრა ხანუქას დღესასწაულის მნიშვნელობაზე. მისი თქმით, ეს არის სინათლის სიბნელეზე, მცირერიცხოვანი ერების ოკუპანტზე გამარჯვების დღე, შესაბამისად, ეს დღესასწაული, სიმბოლურად, საქართველოსთვისაც აქტუალურია.
იციკ მოშემ ახლადგამოცემულ წიგნთან დაკავშირებით განაცხადა, რომ მასში აღწერილია დიდი ალიის ისეთი პერიპეტიები, რომელთა შესახებაც ამ თემაზე დღემდე არსებულ გამოცემებში საუბარი არ ყოფილა. წიგნში დაწვრილებით არის მოთხრობილი, თუ რა სიძნელეები ხვდა წილად ალიის პროცესს; განმარტებულია, რატომ გადაწყდა ისრაელის პირველი წარმომადგენლობის სწორედ საქართველოში დაარსება, როგორ გაიხსნა სოხნუთის პირველი წარმომადგენლობა საბჭოთა მუსლიმანურ რესპუბლიკაში და ა. შ.
აღსანიშნავია, რომ ვიზიტის მიმდინარეობისას აქრამ ჰასონი საქართველოში ისრაელური ინვესტიციით მიმდინარე პროექტებსაც გაეცნო.
აქრამ ჰასონი, საქართველო-ისრაელის ბიზნესპალატის პრეზიდენტთან, იციკ მოშესთან ერთად უკვე შეხვდა საქართველოს ეკონომიკისა და მდგრადი განვითარების მინისტრს, გიორგი ქობულიას. საუბარი საქართველო-ისრაელის ბიზნეს პალატის ინიციატივითა და ისრაელში საქართველოს საელჩოს აქტიური მონაწილეობით, მომავალი წლის დასაწყისში ისრაელში საქართველო-ისრაელის ბიზნეს ფორუმის ჩატარებას შეეხო. მხარეები შეთანხმდნენ, რომ ფორუმი იერუსალიმის ცნობილ სასტუმრო „ვალდორფ ასტორიაში“ ჩატარდება და მას საქართველოს და ისრაელის მთავრობების, აგრეთვე, მსხვილი ბიზნესის წარმომადგენლები დაესწრებიან.
http://medianews.ge
